Muongozo wa kujifunza Biblia kwa watu wakubwa leo 05/04/2022

*LESONI JUMANNE, APRILI 5*

_Usomaji wa Biblia: Kutoka 32_

*KUJIFICHA MBELE ZA MUNGU*

*Soma Mwanzo 3:7-13. Kwa nini Adamu na Hawa walihisi hitaji la kujificha mbele za Mungu? Kwa nini Mungu aliuliza swali “Uko wapi?” Adamu na Hawa walitafutaje kuhalalisha tabia yao?*

*___________________________________________________________*

Baada ya kutenda dhambi, Adamu na Hawa walihisi wako uchi kwa sababu waliyapoteza mavazi yao ya utukufu, yaliyoakisi uwepo wa Mungu (tazama Zab. 8:5, linganisha na Zab. 104:1, 2). Mfano wa Mungu uliharibiwa na dhambi. Kitenzi “kujifanyia” katika kirai “wakajifanyia nguo” (Mwa. 3:7) kufikia hapo kilikuwa kimetumika kwa Mungu Muumbaji tu (Mwa. 1:7, 16, 25, na kadhalika). Ni kana kwamba walichukua nafasi ya Muumbaji walipojaribu kuificha dhambi, kitendo ambacho Paulo anakishutumu kama kuhesabiwa haki kwa matendo (Gal. 2:16). 

Mungu anapofika, anawauliza swali lisilohitaji jibu “ ‘Uko wapi?’ ”(Mwa. 3:9), aina ya swali lile lile ambalo Mungu atamwuliza Kaini (Mwa. 4:9). Bila shaka, Mungu alijua jibu la swali hilo. Maswali yake yaliulizwa kwa manufaa ya wenye hatia, kuwasaidia watambue kile walichokifanya na bado, wakati huo huo, kuwaongoza katika toba na wokovu. Tangu wakati wanadamu walipotenda dhambi, Bwana alikuwa akishughulika na wokovu na ukombozi wao. 

Kwakweli, mpangilio wote wa matukio unaakisi wazo la hukumu ya upelelezi, inayoanzia kwa hakimu, anayemhoji mkosaji (Mwa. 3:9) ili kamwandaa kwa ajili ya kutoa hukumu (Mwa. 3:14-19). Lakini anafanya hivyo pia ili kuchochea toba, ambayo hatimaye itaongoza katika wokovu (Mwa. 3:15). Hili ni wazo linaloonekana pote katika Biblia. 

Kwa mara ya kwanza, kama ilivyo kawaida kwa wenye dhambi, wote Adamu na Hawa wanajaribu kukwepa mashtaka, wakitafuta kuwalaumu wengine. Kwa swali la Mungu Adamu anajibu kwamba ilikuwa ni mwanamke ambaye Mungu alimpatia (Mwa. 3:12)—ndiye alimsababisha kufanya hivyo. Ilikuwa ni kosa lake (na, kumaanisha, lilikuwa ni kosa la Mungu vile vile), si lake. 

Hawa anajibu kwamba ilikuwa ni nyoka aliyemdanganya. Kitenzi cha Kiebrania nasha’, “danganya” (katika Mwa. 3:13), kinamaanisha kuwapa watu tumaini bandia na kuwafanya waamini kwamba wanafanya kitu sahihi (2 Fal. 19:10, Isa. 37:10, Yer. 49:16). 

Adamu anamlaumu mwanamke, akisema kwamba alimpa tunda (kuna ukweli fulani kwa hili), naye Hawa anamlaumu nyoka, akisema ndiye aliyemdanganya (kuna ukweli flan hapa, pia). Lakini mwisho wake, wote walikuwa na hatia.

*Kujaribu kumlaumu mtu mwingine kwa kile alichokifanya? Kwa nini ni rahisi sana kwetu kuangukia mtego ule ule?*