TPLB YATANGAZA KUIKABIDHI SIMBA SC KOMBE LA VPL JULAI 18

Bodi  ya Ligi Kuu Tanzania (TPLB) imetangaza kuwa Julai 18, 2021 ndio itakuwa siku ya kukabidhi rasmi Kombe la ubingwa wa Ligi Kuu ya Vodacom 2020/2021 kwa klabu ya Simba ya Jijini Dar es Salaam.

Simba ambao walitwaa ubingwa huo Julai 11 baada ya kufikisha alama 79 kufuatia ushindi wa mabao 2-0 walioupata dhidi ya Coastal Union FC, watakabidhiwa Kombe hilo na Medali baada ya kumalizika kwa mchezo wao wa mwisho wa Ligi Kuu ya Vodacom dhidi ya Namungo FC.

Aidha, Bodi ya Ligi imeipongeza klabu ya Simba kwa kutwaa ubingwa huo. 

Pia imezipongeza klabu zote shiriki kwa kuendelea kuonesha ushindani wa hali ya juu uliosaidia kuongeza ubora wa michuano hiyo ya mpira wa miguu inayoshika nafasi ya nane (8) kwa ubora barani Afrika.