RIPOTI YA FEI BADO, AFYA YAKE SIO NZURI

Klabu ya Yanga kupitia Ofisa Habari wao, Hassan Bumbuli imesema kwa sasa wanasubiri kupata ripoti kamili kutoka kwa daktari wa Stars, Lisobine Kisongo juu ya hali ya majeraha ya kiungo hiyo kisha ndipo wao watatoa taarifa rasmi.

Akizungumza na Mwanaspoti, Bumbuli alisema utaratibu mchezaji anapokuwa anatoka kwenda timu ya taifa hali ya kiafya huwa inajazwa na wachezaji wao walikuwa fiti.

“Mchezaji hata kama akiwa anaumwa, ila ameitwa Stars utaratibu ni lazima aende halafu baada ya hapo ndio utasema anaumwa kitu fulani kwa kujaza kwenye fomu,” alisema Bumbuli.

“Sasa upande wa Fei tunasubiri kupata ripoti yake tuone kitu ambacho anaumwa. iInawezekana amejitonesha kile ambacho aliumia awali, ripoti ni utaratibu wa kawaida.”

Bumbuli alikiri kuwa mchezaji huyo awali aliumia na benchi la ufundi pamoja na madaktari wao waliamua apumzishwe na kuna mechi za timu hiyo ambazo alizikosa.

“Kama unakumbuka kuna mechi Feisal alizikosa na hiyo ni baada ya kuumwa. Alipokaa sawa na mwenyewe kusema fiti alirudi uwanjani na kuendelea kucheza na ndio maana hadi anaenda Stars alikuwa fiti na akacheza mechi moja,” alisema.

Kwa upande wake, daktari wa Yanga, Sheikh Mngazija alisema:

“Tunasubiri ripoti kutoka kwa daktari wa timu ya taifa, ila mchezaji yupo kambini kwa sasa.”