mafunzo ya watu wazima leo 21

LESONI, JANUARI 21

SOMO: HUZUNI YA WAFU WALIO HAI WASIO NA SHUKURANI (ISA. 8:16—22)

Soma aya hapo juu. Inazungumzia nini? Jambo hili linamhusuje Mfalme Ahazi? Andika mawazo kwa muhtasari.

Ahazi alikuwa amezama katika dini ya kipagani (2 Walme 16:3, 4, 10—15; 2 Nya. 28:2—4, 23—25), ambayo iliambatana sana na kuabudu mashetani (linganisha na Kum. 32:17; “Wanatoa kafara kwa mashetani”, 1 Kor 10:20). Vipengele mbalimbali vya uchawi wa kisasa vinafanana sana na matendo ya ibada za mashetani ya zamani za Mashariki ya Kati, kama inavyooneshwa katika maandishi yaliyoko nje ya Biblia. Kwa hakika, hata mengi ya mambo yanayofanywa leo katika dini ya Kizazi Kipya ni yale yale yaliyofanywa katika ibada ya zamani ya mashetani. 

Maelezo ya Isaya ya kukatisha tamaa kunakotokana na kutegemea roho zingine badala ya kumtegemea Bwana (Isa. 8:21, 22) yanamstahili Ahazi kabisa (linganisha na 2 Nya. 28:22, 23). Isaya anazungumzia watu wanaokasirika na kumlaani mfalme wao (Isa. 8:21). Jambo hili lingemwonya Ahazi kuwa kwa kuwaongoza watu kuabudu mashetani watu wangemlaani. Kwa kweli, Ahazi alipokufa, alizikwa tofauti na wafalme waliomtangulia kama ishara ya kumdharau: “hawakumleta makaburini mwa wafalme wa Israeli” (2 Nya. 28:27). 

Aya hizi zinaeleza nini kuhusu ibada ya mashetani? Law. 20:27, Kum. 18:9—14.

Kujitenga na ibada ya mashetani ni suala la uaminifu kwa Mungu. Kitabu cha Kwanza cha Nyakati 10:13, 14 hutumia kanuni hii kuhusiana na Mfalme Sauli: “Basi Sauli alikufa kwa sababu ya kosa lake alilomkosa Bwana, kwa sababu ya neno la Bwana, asilolishika; na tena kwa kutaka shauri kwa mwenye pepo wa utambuzi, aulize kwake, asiulize kwa Bwana; kwa hiyo akamwua, na ufalme akamgeuzia Daudi, mwana wa Yese.” 

Hebu chunguza maisha yako mwenyewe na mivuto inayokuzunguka. Ni kwa jinsi gani unakutana, bila kutarajia, na kanuni za ibada ya mashetani na za ibada ya wafu? Na hata kama huwezi kuziepuka kabisa, ni jambo gani waweza kulifanya kupunguza mvuto wake kwako, au kwa familia yako?