Mafunzo ya watu wazima leo 20

LESONI, JANUARI 20

SOMO: HATUNA CHA KUOGOPA TUNAPOMCHA MUNGU MWENYEWE (ISA. 8:11—15)

Katika hotuba yake ya kwanza ya uzinduzi, Rais wa Marekani, Franklin D. Roosevelt, aliliambia taifa lililokuwa limevunjika moyo kuwa "Jambo pekee ambalo inatupasa kulihofia ni hofu yenyewe" —U.S. Capitol, Washington, D.C. (March 4, 1933). Ujumbe wa Isaya kwa watu wake waliovunjika moyo: “Hatupaswi kuogopa jambo lo lote pale tunapomcha Mungu.” 

Mungu alimwonya Isaya aache kuogopa kile ambacho watu wake walikiogopa, bali wamche Mungu Mwenyewe (Isa. 8:12, 13). Hii ni mada muhimu sana katika Maandiko. Kwa mfano, katika Ufunuo 14:6—12, malaika watatu hutangaza ujumbe wa ulimwengu wote: Mcheni Mungu na kumtukuza, badala ya kumcha na kumtukuza mnyama wa duniani aliyeelezwa katika sura ya 13. 

Unalielewaje wazo la “kumcha” Mungu? Jambo hili linamaanisha nini hususani tukizingatia amri inayotuagiza kumpenda Mungu, pia (Mathayo 22:37)?

Hofu ya kweli kwa Mungu humaanisha kumtambua kama mamlaka ya juu kabisa katika ulimwengu. Uwe unampenda au la, hofu hiyo huondoa hofu zingine zote. Ikiwa Mungu yuko upande wako, hakuna ye yote anayeweza kukugusa bila ruhusa Yake. Ikiwa yuko kinyume chako kwa sababu umemwasi, unaweza kukimbia, lakini huwezi kujificha! 

Je, wazo kuwa inatupasa kumcha Mungu halipangani na 1 Yohana 4:18? “Katika pendo hamna hofu; lakini pendo lililo kamili huitupa nje hofu, kwa maana hofu ina adhabu; na mwenye hofu hakukamilishwa katika pendo.” 

Kuna hofu za aina mbalimbali. Ikiwa mtu fulani aliye na mamlaka kubwa ni rafiki yako, na mnapendana, humwogopi mtu huyo kwa kuwa hufikiri kuwa atakudhuru. Lakini unayo aina fulani ya hofu kwake kwa kuwa unatambua na kuheshimu mamlaka ya yule mtu na mipaka ya uhusiano wenu. 

Kama Wakristo hatupaswi kupenda vitu vya ulimwengu huu, vitu ambavyo watu wa ulimwengu huu wanavipenda (1 Yohana 2:15). Kwa kufikiria, hivyo basi, kwa njia zilizotofauti lakini zilizo sambamba, kama Wakristo, je, kuna mambo ambayo watu wa ulimwengu wanayaogopa ambayo sisi kama Wakristo hatupaswi kuyaogopa? Wakati huo huo, ni mambo gani ambayo watu wa ulimwengu hawayaogopi ambayo sisi Wakristo tunapaswa kuyaogopa? Tazama, kwa mfano, Mathayo 10:28; Yer. 10:2, 3.