Mume wa aliyekuwa mwimbaji Angela Chibalonza amtambulisha mwanawe kwa umma .

Marehemu Angela Chibalonza alifariki mwaka wa 2007 baada ya kuhusika katika ajali mbaya ya barabarani .

Chibalonza alikuwa amejaliwa mtoto wa kike, Wonder Gloria ambaye alikuwa mwenye umri wa miezi 9 wakati Chibalonza aliaga dunia.

Kulingana na ujumbe wa mhubiri aliyetambulika kama Musili wa kanisa la ATG, mumewe Chibalonza, Elisha Muliri alisimulia masaibu aliyoyapitia akimlea mtoto huyo.

"Wakati mke wangu alifariki mwaka wa 2007 kutokana na ajali mbaya ya barabarani, Wonder angemlilia mamake huku mimi naye nikimboleza kifo chake, kwa hayo yote nilikuwa na kibarua kigumu kumbembeleza ili aweze kupata lepe la usingizi, kwa kweli nilipitia wakati mgumu," Muliri aliwaambia waumini wa kanisa la ATG,Embakasi.

Kulingana na Muliri ambaye anaishi nchini Tanzania na mwanawe, hakumbuki ni mara ngapi angembembeleza mtoto wake ajihisi kwamba yuko karibu na mamake ila ilikuwa kwa neema ya Mungu tu.

Muliri pia alifichua kwamba hajawahi kosa kuomboleza kifo cha mkewe miaka 11 iliyopita kwani yeye humkosa sana.

Glory sasa yuko katika darasa la sita na anasoma katika shule ya msingi ya PCEA kule Nairobi West.

Muliri naye ni mhubiri katika kanisa la Ebenezer Gospel Church Dar es Salaam nchini Tanzania.