Askofu Anglikana awataka waumini wasishabikie migogoro ya kanisa

Leo Jumapili katika ibada;
Dar es Salaam. Askofu Mkuu wa Kanisa la Anglikana Dayosisi ya Dar es Salaam, Jackson Sosthenes amewataka waumini wa kanisa hilo kuachana na migogoro na kuwa kitu kimoja ili kuijenga dayosisi hiyo.

Amesema kwa kipindi kirefu dayosisi hiyo ilikumbwa na mgogoro uliosababisha waumini kugawanyika pande mbili na kuzua sintofahamu kwenye kanisa hilo.

Mgogoro huo ulidaiwa kutokana aliyekuwa Askofu Mkuu wa Anglikana Tanzania, Dk Jacob Chimeledya kumuamuru aliyekuwa askofu wa dayosisi hiyo, Dk Valentino Mokiwa kujiuzulu nafasi hiyo kwa tuhuma za matumizi mabaya ya madaraka na ubadhirifu wa fedha za kanisa hilo.

Hata hivyo, Dk Mokiwa alikana na tuhuma hizo kwa wakati huo na kusema kuwa ni mgogoro unaosukwa na maadui zake.

Askofu Sosthenes aliyechaguliwa Desemba mwaka jana kuchukua nafasi ya Dk Mokiwa, alitoa kauli hiyo jana wakati wa ibada ya kutoa kipaimara iliyofanyika Kanisa la Anglikana Mtaa wa Mtakatifu Anthony, Tabata Kimanga wilayani Ilala.

“Tulipitia kipindi kigumu sana na tulioyapitia yametosha, ifike mahali waumini tuseme migogoro ndani ya Anglikana imetosha. Nataka Anglikana isomeke kwamba ni kanisa bora linalojenga makanisa mengine kwa ajili ya ibada kwa waumini.

“Hatuwezi kuiponya dayosisi hii kwa kila mtu kuonyesha makovu yake kwa mambo yaliyopita. Sasa hivi ni wakati wa kuungana na kuwa kitu kimoja kwa manufaa na maendeleo ya dayosisi hii,” alisema Askofu Sosthenes.

Alisema ilifika baadhi ya watu wakigombana, wanaulizwa mbona ugomvi au mgogoro usioisha kama kanisa la Anglikana jambo ambalo halikuleta taswira nzuri katika kanisa hilo.

Mbali na hilo, Askofu Sosthenes aliwataka watoto waliopata kipaimara kuwa na utamaduni wa kuhudhuria ibada mara kwa mara, badala ya kudhani wao kupata nafasi ni sawa sherehe ya ‘send off’.

“Leo (jana), hatukuja kufanya send off, jitahidini muwe mnahudhuria ibada. Kila mmoja awe mlinzi wa mwenzake katika kuhakikisha ili linatekelezeka,”alisema Askofu Sosthenes.

Pia, alisema kanisa hilo, lipo katika mchakato wa kununua eneo la eka 10 lenye thamani ya Sh250 milioni ambalo lipo Bagamoyo na lina majengo mbalimbali kwa ajili ya matumizi ya dayosisi hiyo.

“Nimesitisha mchakato wa kukarabati nyumba ya askofu na ununuzi wa gari ili kuhakikisha eneo hili tunalipata. Naomba waumini tushirikiane ili kuhakikisha ili linafanikiwa,” alisema Askofu Sosthenes.