FANYA KAZI KUOKOA ROHO

IJUMAA, MEI 13 2022

FANYA KAZI KUOKOA ROHO SIKU YA SABATO 

Nitafanya wanadamu kuadimika kuliko dhahabu safi, na watu kuliko dhahabu ya Ofiri. Isaya 13:12.

📚 Ikiwa ilikuwa sahihi kwa Daudi kukidhi njaa yake kwa kula mkate ambao ulikuwa umetengwa maalum kwa matumizi matakatifu, basi ilikuwa sawa kwa wanafunzi kukidhi hitaji lao kwa kuvunja nafaka wakati wa saa takatifu za Sabato. Tena, makuhani hekaluni walifanya kazi kubwa katika siku ya Sabato kuliko siku nyinginezo. Kazi ambayo kulingana na shughuli za kidunia kuzifanya katika Sabato ingekuwa dhambi; lakini kazi ya makuhani ilikuwa kwenye utumishi wa Mungu. Walikuwa wakitimiza ibada zile zilizoelekeza kwenye nguvu iokoayo ya Kristo, na kazi yao ilipatana na kusudi la Sabato. Lakini sasa Kristo alikuwa amekuja. Wanafunzi, wakifanya kazi ya Kristo, walikuwa wakijihusisha na huduma ya Mungu, na kile kilichokuwa cha muhimu kwa kuikamilisha kazi hii ilikuwa sahihi kukifanya siku ya Sabato.

📚 Kristo alitaka kuwafundisha wanafunzi Wake na adui zake kwamba huduma ya Mungu ni ya kwanza kwa zote. Kusudi la kazi ya Mungu katika dunia hii ni ukombozi wa jamii ya wanadamu; hivyo basi kile ambacho ni muhimu kifanyike katika siku ya Sabato kwa ukamilishaji wa kazi hii kinapatana na sheria ya Sabato. Kisha Yesu akahitimisha mjadala wake kwa kujitangaza kuwa "Bwana wa Sabato," mmoja ambaye yu juu ya maswali na sheria yote. Jaji huyu wa milele huwaacha huru wanafunzi Wake dhidi ya lawama, akisihi kwa sheria hiyo hiyo waliyotuhumiwa kuihalifu....

🔘 Sabato nyingine, Yesu alipoingia ndani ya Sinagogi, aliona mtu aliyepooza mkono. Mafarisayo wakamwangalia, wakiwa na shauku ya kuona atafanya nini. Mwokozi akijua vyema kuwa kwa kuponya siku ya Sabato angechukuliwa kama mkosaji, bado hakusita kuuvunja ukuta wa madai ya kitamaduni ambayo yalikuwa kizuizi kwa Sabato. Yesu alimtaka yule mtu aliyepooza kusimama mbele na kisha akauliza, "Ni halali siku ya Sabato kutenda mema, au kutenda mabaya? Kuponya roho au kuiua?" Ilikuwa ni kanuni miongoni mwa Wayahudi kuwa kushindwa kufanya mema, wakati mtu alikuwa na fursa, ilikuwa ni kufanya uovu; kupuuza kuokoa maisha ilikuwa ni kuua. Hapo Yesu aliwakabili katika kanuni yao. "Wakanyamaza. Akawakazia macho pande zote kwa hasira, akiona huzuni kwa ajili ya ugumu wa mioyo yao, akamwambia yule mtu, Nyosha mkono wako. Naye akaunyosha; mkono wake ukawa mzima tena" (Marko 3:4, 5).

MWENYEZI MUNGU AKUBARIKI SANA