AMKA NA BWANA LEO 09/12/2021

KESHA LA ASUBUHI 

ALHAMISI: Desemba 9 2021

JINSI MUNGU ANAVYOUONA UKUU

Mji huu sio Babeli mkubwa nilioujenga mimi, uwe kao langu la kifalme, kwa uwezo wa nguvu zangu, ili uwe utukufu wa enzi yangu? Daniel 4:30.

✍🏽 Nguvu ya mataifa na ya watu binafsi haipatikani katika fursa na vifaa vinavyoonekana kuwafanya wasishindwe, haipatikani kutoka katika majivuno ya ukuu wao. Kile ambacho kinaweza kuwafanya kuwa wakuu au wenye nguvu ni nguvu na kusudi la Mungu. Wao wenyewe, kwa mtazamo wao kuelekea kusudi Lake, huamua hatima yao wenyewe.

✍🏽 Historia za wanadamu zinasimulia mafanikio ya mwanadamu, ushindi wake katika vita, na kufanikiwa kwake kufikia vilele vya ukuu wa kidunia. Historia ya Mungu humwelezea mwanadamu kama vile mbingu zinavyomtazama. Katika kumbukumbu za kimbingu sifa zake zote zinajumuishwa katika utii wake kwa matakwa ya Mungu. Kutokutii kwake kunatunzwa kwa uaminifu katika kitabu cha kumbukumbu stahiki kwa adhabu atakayopokea hakika. Katika nuru ya milele itaonekana kuwa Mungu anashughulika na watu kulingana na suala kubwa la utii au kutotii.

✍🏽 Mamia ya miaka kabla wanadamu hawajafikia katika hatua ya utendaji, kalamu ya unabii, chini ya uongozi wa Roho Mtakatifu, imefuatilia historia yao....

✍🏽 Sauti ya Mungu, iliyosikiwa hapo zamani, inasikika sasa katika mstari kutoka karne hata karne, kupitia vizazi ambavyo vimekuja katika uwanda wa matukio na kutoweka. Je! Mungu atazungumza na sauti yake isiheshimiwe? Je! Ni nguvu gani iliyopanga historia yote hii, ili mataifa, moja baada ya jingine, yakae katika wakati na mahali palipotabiriwa, kuushuhudia ukweli bila kujua kwamba wao wenyewe hawakujua maana yake?...

✍🏽 Mungu amempatia kila mtu sehemu katika mpango Wake mkuu. Kwa ukweli au uongo, kwa upumbavu au hekima, kila mtu analitimiza kusudi, kuleta matokeo halisi....

🔘 Kwa macho ya kidunia, wale wanaomtumikia Mungu wanaweza kuonekana kuwa wanyonge. Wanaweza kuonekana kuzama chini ya mawimbi, lakini kwa wimbi jingine wanaonekana wakiibukia karibu na bandari yao. "Nami nawapa uzima wa milele;" asema Bwana wetu; "...wala hakuna mtu atakayewapokonya katika mkono wangu" (Yohana 10:28). Ijapokuwa wafalme watadhiliwa na mataifa kuondoshwa, roho zile ambazo kwa imani zinajiunganisha na makusudi ya Mungu zitadumu milele. "Na walio na hekima watang'aa kama mwangaza wa anga; na hao waongozao wengi kutenda haki watang'aa kama nyota milele na milele" (Daniel 12:3).

MUNGU AKUBARIKI SANA