MWONGOZO WA KUJIFUNZA BIBLIA KWA WATU WAZIMA LEO 28/11/2021

*LESONI LEO.*

Jumapili, 28/11/2021.

*KUUKUMBUKA UPINDE WA MVUA.*

Usomaji wa Biblia: Waebrania 10.

Mara ya kwanza neno “kumbuka” kuonekana ni katika Biblia katika Mwanzo 9, wakati —baada ya gharika ya ulimwengu mzima —Bwana alimwambia Nuhu kwamba angeweka upinde wa mvua angani kama ishara ya agano lake na dunia yote, kwamba kamwe asingeharibu tena dunia yote kwa gharika.

Soma Mwanzo 9:8—17. Ni kwa namna gani neno “kumbuka” linatumika hapa, na tunaweza kujifunza nini kutokana na matumizi yake kwa namna tunavyopaswa kukumbuka kile Mungu alichotutendea?

Bila shaka, Mungu hahitaji upinde wa mvua kukumbuka ahadi yake na agano lake. Alizungumza tu katika lugha ambayo wanadamu wangeweza kuelewa. Badala yake, upinde wa mvua ni kwa ajili yetu, kama wanadamu, kukumbuka ahadi ya Mungu na agano lake kutokuiharibu dunia tena kwa maji.

Kwa maneno mengine, upinde wa mvua ulikuwa kwa ajili ya kuwasaidia watu kukumbuka agano hili la pekee alilofanya Mungu; kila wakati upinde wa mvua unapotokea, watu wa Mungu wataweza kukumbuka, sio tu hukumu juu ya ulimwengu kwa dhambi yake lakini pia upendo wake kwa ulimwengu na ahadi yake ya kutoigharikisha tena. Kwa hiyo, tunaona hapa umuhimu wa wazo la kukumbuka: kukumbuka ahadi za Mungu, kukumbuka maonyo ya Mungu, kukumbuka utendaji wa Mungu katika ulimwengu.

Upinde wa mvua katika anga unakuwa muhimu zaidi sana leo wakati, kutokana na mwendelezo wa sheria za asili, wanasayansi wengi wanapinga wazo kwamba kulikuwepo na gharika ya ulimwengu mzima mwanzoni. Inavutia kiasi gani kwamba Ellen G. White aliandika kwamba kabla ya gharika kuja, watu wengi walikuwa na wazo la kufanana kwamba mwendelezo wa sheria za asili unapinga uwezekano kwamba gharika ya ulimwengu mzima ingeweza kutokea. Aliandika kwamba wenye hekima walibishana kwamba “sheria za asili zimewekwa imara kiasi kwamba Mungu mwenyewe hawezi kuzibadilisha.” _—Patriarchs and Prophets, uk. 97.`

Kwa hiyo kabla ya Gharika, watu walibishana, kutokana na sheria za asili, kwamba isingekuja; baada ya Gharika, watu wanatoa hoja, kutokana na sheria za asili, kwamba kamwe haikutokea hapo mwazo.

Hata hivyo, Mungu katika Neno Lake alitwambia kuhusu Gharika na kuupatia ulimwengu ishara, sio tu kwa ajili ya Gharika, lakini ya ahadi yake ya kutoleta gharika nyingine. Hivyo, tukikumbuka kile kinachomaanishwa na upinde wa mvua, tunaweza kuwa na hakika, ulivyoandikwa katika anga katika rangi hizi za kupendeza, kwamba Neno la Mungu ni kweli. Na ikiwa tunaweza kuamini Neno lake katika ahadi hii, kwa nini tusilitumaini Neno lake kwa yale yote anayotwambia, vile vile?

Wakati mwingine utakapoona upinde wa mvua, fikiria kuhusu ahadi za Mungu. Tunawezaje kujifunza kuzitumaini hizo ahadi?