KAMATI KUU YA CCM YAKUTANA KUJADILI MAMBO MBALIMBALI

Kamati Kuu ya Halmashauri Kuu ya Chama Cha Mapinduzi (CCM) Taifa imekutana katika kikao maalum jana Jumapili 3 Oktoba 2021 Ikulu ya Chamwino Jijini Dodoma, chini ya Mwenyekiti wa CCM na Rais wa Jamhuri ya Muungano wa Tanzania Ndugu Samia Suluhu Hassan.

Pamoja na mambo mengine Kamati Kuu imempongeza Rais wa Jamhuri ya Muungano wa Tanzania Mheshimiwa Samia Suluhu Hassan kwa kushiriki na kuhutubia Mkutano wa 76 wa Baraza Kuu la Umoja wa Mataifa na kuihakikishia Jumuiya ya Kimataifa kuwa katika uongozi wake Tanzania itaendelea kuwa mstari wa mbele katika kushirikiana na mataifa na wadau wengine wa maendeleo duniani kutatua changamoto zinazoukabili ulimwengu kwa sasa.

Kamati Kuu imeridhishwa na mwenendo wa Serikali ya awamu ya 6 inayoongozwa na Mheshimiwa Samia Suluhu Hassan kwa jinsi inavyoimarisha diplomasia ya Uchumi na sasa wawekezaji mbalimbali wameendelea kuvutiwa na kufanya uwekezaji nchini jambo ambalo litashamirisha shughuli za maendeleo na kufungua uchumi wa nchi.

Aidha Kamati Kuu imempongeza Rais wa Serikali ya Mapinduzi ya Zanzibar na Mwenyekiti wa Baraza la Mapinduzi Dkt. Hussein Ali Mwinyi kwa kuendelea kuiongoza vyema Zanzibar na kuhakikisha ilani ya uchaguzi ya CCM 2020-2025 inaendelea kutekelezwa kwa mafanikio makubwa.

Wakati huo huo kamati Kuu imepokea taarifa ya ziara ya Sekretarieti ya Halmashauri Kuu ya CCM Taifa iliyoongozwa na Katibu Mkuu wa CCM Komredi Daniel Chongolo iliyofanyika tarehe 15-21 Septemba 2021 katika mikoa ya Lindi, Mtwara, Ruvuma na Njombe ambapo Serikali imeahidi kufanyia kazi maelekezo yote yaliyotolewa na Chama katika ziara hiyo.

(Via; Katibu wa Halmashauri Kuu ya CCM Taifa Itikadi na Uenezi Ndg. Shaka Hamdu Shaka).