Baba afukuzwa kwenye sherehe ya mtoto wake na Mchungaji kwa kosa la ulevi

Kioja kilishuhudiwa mtaa wa Kivaa, Masinga katika kanisa moja pale ambapo pasta alimfurusha mwenyekiti wa kanisa lake kwa kubugia pombe wakati wa sherehe ya kulipa mahari ya bintiye.

Inasemekana kwamba, licha ya hafla hiyo kuhudhuriwa na waumini wa kanisa hilo, jamaa alichangamkia mvinyo na kulewa chakari huku akiwaacha watu vinywa waziKuliganana na Taifa Leo, baadhi ya waumini ambao walikerwa na tabia ya kiongozi huyo walitishia kumshtaki kwa mchugaji.

Penyenye zinaarifu kwamba, wakati pasta alipopashwa habari hiyo aliamua kumkabili jamaa kanisani na kumlaumu vikali kwa kukosa heshima.

"Kwa nini ulilewa wakati wa sherehe ya kulipa mahari ya mwanao? Nimejulishwa kila kitu kilichotokea siku hiyo. Baada ya kulewa chakari ulianza kuropokwa ovyo. Kama kiongozi kanisani humu unapaswa kuwa mfano mwema na wala sio kuwapotosha waumini. Umenikasirisha sana na kwa hivyo sitaki kukuona kanisani humu tena. Sikubali mtu mwenye tabia kama yako hapa," jamaa alifokewa kanisani.Juhudi za kujaribu kujitetea ziligonga mwamba kwani pasta alikataa kata kata kumsikiza mzee huyo.

"Wacha kunikemea kama mtoto. Mimi ni mtu mzima na ninakushinda kwa umri. Hufai kunikemea na kunidhalilisha mbele ya watu. Hiyo ilikuwa siku yangu ya furaha kwa kuwa binti yangu alikuwa akiolewa," jamaa alijitetea.
Buda alijaribu kupuuza alivyoagizwa na badala yake akaendelea kuketi kanisani humo ila mhubiri alikabiliana naye na kumnyanyua kwenye kiti huku akimrusha nje.Ilimbidi mzee kuondoka baada ya kushauriwa na watu kuwacha kubishana na mchugaji.

Waumini walisalia wakinong'onezana kuhusu kisa hicho huku baadhi yao wakidai kwamba buda huyo alikuwa na mazoea ya kulewa ovyo na kuaibisha kanisa licha ya cheo chake.